कवर्धा। कबीरधाम जिला म करीब दू महीना पहिली होय डांस गुरु हत्या कांड के आखिरकार पुलिस खुलासा कर डारे हवय। लंबा समय ले चलत गहन जांच, तकनीकी पड़ताल अउ लगातार पूछताछ के बाद पुलिस ए सनसनीखेज मामला म एक बड़ा सुराग तक पहुंचिस। पुलिस ए मामला म कानून ले संघर्ष करत एक नाबालिग लइका ला अभिरक्षा म ले हवय, जेन पूछताछ के दौरान हत्या करे के बात स्वीकार करे हवय।
पुलिस के मुताबिक मरे वाला डांस शिक्षक नाबालिग ऊपर गलत संबंध बनाय बर दबाव डालत रहिस। जब लइका मना करत रहिस त वो ओकर ला बार-बार ब्लैकमेल कर धमकी देवत रहिस। ए बात ले नाबालिग बहुत दिन ले मानसिक रूप ले परेशान रहिस। आखिरकार लगातार दबाव अउ धमकी ले तंग आके नाबालिग गुस्सा म आइस अउ हत्या करे के फैसला कर लीस।
दरअसल 17 जनवरी 2026 के दिन कवर्धा थाना क्षेत्र के लालपुर नर्सरी पाछू सड़क किनारे एक युवक के लाश मिलिस। राहगीर मन लाश देखके पुलिस ला खबर देइन। सूचना मिलतेच पुलिस टीम तुरंत घटना स्थल पहुंचिस अउ जांच शुरू करिस। शुरुआती जांच म पता चलिस के युवक के गला म धारदार हथियार, संभवतः चाकू ले वार करके हत्या करे गीस।
बाद म मृतक के पहचान सत्यमदास मानिकपुरी (27 साल) निवासी वार्ड नंबर 26 घोठिया रोड कवर्धा के रूप म होइस। सत्यमदास पेशे ले डांस शिक्षक रहिस अउ पांडातराई इलाका के एक निजी स्कूल म बच्चा मन ला डांस सिखावत रहिस। जवान शिक्षक के अचानक हत्या होगे ले इलाका म सनसनी फैल गे रहिस।
मामला के गंभीरता ला देखते पुलिस अधीक्षक के निर्देश म विशेष जांच टीम गठित करे गीस। पुलिस हर एंगल ले मामला के जांच शुरू करिस। तकनीकी जांच के तहत करीब 50 हजार मोबाइल नंबर के कॉल डाटा खंगाले गीस। संगेच 500 ले जियादा सीसीटीवी कैमरा के फुटेज ला बारीकी ले देखे गीस।
एहीच नइ, पुलिस मृतक के दोस्त, परिचित अउ आसपास के इलाका के 100 ले जियादा मनखे मन ले पूछताछ घलो करिस। कई संदिग्ध मन ला थाना बुलाके पूछताछ करे गीस, फेर शुरुआत मं पुलिस ला कोई ठोस सुराग नइ मिलत रहिस।
जांच के दौरान पुलिस सोशल मीडिया के गतिविधि ऊपर घलो ध्यान देइस। मृतक के मोबाइल, इंस्टाग्राम अउ दूसर डिजिटल प्लेटफॉर्म के जानकारी के तकनीकी जांच करे गीस। एही दौरान पुलिस के संदेह धीरे-धीरे एक नाबालिग लइका ऊपर जाके टिकिस।
पूछताछ मं पता चलिस के मृतक सत्यमदास अउ नाबालिग लइका के बीच करीब तीन महीना ले जान-पहचान रहिस। आरोप हवय के सत्यमदास लइका ऊपर गलत संबंध बनाय बर दबाव डालत रहिस। जब लइका ए बात ला ठुकरावत रहिस त वो ओकर ला ब्लैकमेल कर डरावत रहिस। ए स्थिति ले लइका मानसिक रूप ले काफी परेशान होगे रहिस।
पुलिस के मुताबिक घटना वाले दिन नाबालिग योजना बनाके घर ले निकलिस। वो अपने संग चाकू घलो रखे रहिस। नाबालिग व्हाट्सएप कॉल करके सत्यमदास ला अपन पास बुलाइस। जब वो आय त नाबालिग ओकर ला स्कूटी म बइठाके लालपुर नर्सरी पाछू सुनसान इलाका ले गीस।
जइसेच दुन्नो घटना स्थल पहुंचिन, मौका पावत नाबालिग अचानक चाकू निकाल के सत्यमदास के गला म वार कर दीस। वार बहुत गहिरा रहिस, जेकर ले सत्यमदास के मौके म ही मौत होगे।
घटना के बाद आरोपी डर गे रहिस। पुलिस तक सुराग नइ पहुंचे ए सोचके वो मरे वाला के मोबाइल फोन अउ सिम कार्ड ला अलग-अलग जगह नदी म फेंक दीस। फेर पुलिस के लगातार जांच अउ तकनीकी विश्लेषण के चलते आखिरकार आरोपी तक पहुंचना संभव होइस।
पुलिस आरोपी के बताय अनुसार घटना म उपयोग करे स्कूटी, चाकू, खून लगे कपड़ा अउ नदी म फेंका गे मोबाइल फोन बरामद कर ले हवय। हालांकि सिम कार्ड के तलाश अभी घलो जारी हवय।
पुलिस नाबालिग के मोबाइल के जांच घलो करिस। जांच म पता चलिस के वो इंटरनेट म अपराध, हत्या अउ मनोविज्ञान से जुड़े कई विषय म सर्च करे रहिस। फिलहाल पुलिस नाबालिग ला अभिरक्षा मं लेके आगे के कानूनी कार्रवाई करत हवय अउ मामला के जांच जारी हवय।