धरसींवा | 23 जनवरी 2026 के धरसींवा खंड अंतर्गत गांव मोहदी म आज छत्तीसगढ़ महतारी के मुरती स्थापना अउ महाआरती के पावन कार्यक्रम रखे गे रहिस। ए आयोजन म धरसींवा खंड के जम्मो सेनानी, पदाधिकारी, कार्यकर्ता अउ भारी संख्या म गांव के महतारी-बहिनी, युवा संगवारी अउ बुजुर्ग मन शामिल होइस।
ए कार्यक्रम अमित बघेल के विचार अउ लगातार चलत जनजागरण अभियान के तहत आयोजित करे गे रहिस। गांव-गांव म छत्तीसगढ़िया समाज ल जगा के, महतारी-बहिनी अउ युवा संगवारी मन ल जोड़ के छत्तीसगढ़िया अस्मिता, संस्कृति अउ स्वाभिमान के संदेश पहुंचाए जात हवय।
छत्तीसगढ़िया क्रान्ति सेना अउ जोहार छत्तीसगढ़ पार्टी ह लगातार गांव-गांव म छत्तीसगढ़ महतारी के मुरती स्थापना करत हवय। ये अभियान के मकसद छत्तीसगढ़ के पहचान, परंपरा अउ छत्तीसगढ़ियापन ल मजबूत करना बताइस गे।
महाआरती के दौरान पूरा गांव छत्तीसगढ़ महतारी के जयकारा ले गूंज उठिस। महिलामन, युवामन अउ बुजुर्गमन के बढ़-चढ़ के भागीदारी रहिस। गांव वाले मन कहिन कि ए किसिम के आयोजन ले समाज म एकता मजबूत होथे अउ छत्तीसगढ़िया चेतना जागथे। कार्यक्रम ह पूरा श्रद्धा, अनुशासन अउ शांतिपूर्ण माहौल म संपन्न होइस।